Jemba litumiaji la dawa za kulevya lachanganyikiwa lacharanga watu mapanga ,hapa likiwa limemng'ang'ania mlemavu kama ngao yake ili kukwepa kucharangwa mapanga na wananchi wenye jazba mbaya
Binti aliyejeruhiwa PICHA ZAIDI BOFYA HAPA
WANANCHI wenye hasira kali wakazi wa eneo la Meta jijini Mbeya jana nusuru wamtoe roho aliyekuwa mfanyabiashara wa nyama katika eneo hilo aliyetambuliwa kwa jina moja la Stanley baada ya kijana huyo kuigeuza siku ya wapendanao kuwa siku ya wachukianao kwa kuwajeruhi watu zaidi ya wanne kwa mapanga na kuharibu mali mbali mbali baada ya kudaiwa kutumia dawa za kulevya aina ya bangi.
Tukio hilo ambalo lilikuwa kama sinema katika eneo hilo la Meta na kupelekea umati mkubwa wa wananchi kufurika katika eneo hilo lilitokea majira ya saa 8 mchana muda mfupi bada ya kijana huyo kuwajeruhi watu watatu kwa mapanga na kuharibu mali mbali mbali likiwemo lori lenye namba za usajili SU 37740 mali ya shirika la umeme jijini Mbeya.
Wakielezea tukio hilo kwa mwandishi wa habari hizi baadhi ya mashuhuda walidai kuwa kijana huyo alikuwa akifanya kazi ya kuuza bucha katika eneo hilo alipata kusimama kuendelea na kazi hiyo kwa zaidi ya mwezi mmoja sasa kabla ya jana kuibukia katika eneo hilo la bucha huku akiwa na kisu aina ya sime mfukono.
Walisema kuwa baada ya kufika eneo hilo alimtishia mfafanyabiashara wa matunda katika eneo hilo kuwa amekuja kwa ajili ya kumuua hali iliyopelekea mwanamke huyo kuacha biashara yake na kukimbilia kituo cha polisi kilichopo jirani na eneo hilo.
Hata hivyo walisema baada ya mwanamke huyo kwenda polisi kuripoti juu ya uvamizi huo kijana huyo aliendelea kuharibu matunda yake pamoja na meza na baada ya hapo aliligeukia lori la Tanesco na kuanza kulikata mapanga kabla ya wafanyakazi wake wawili kujitosa kupambana na kijana huyo ambaye alipata kuwajeruhi wa panga .
Waliwataja watumishi hao wa Tanesco ambao walijeruhiwa kuwa ni Geofrey Bukuli na Peter Mwasantaja na kupelekea wafanyakazi wenzao kutimua mbio na kuliacha lori hilo kabla ya wananchi kuamua kuanza kupambana na kijana huyo kwa mawe ,marungu na mapanga .
Hata hivyo wakati mapambano hayo yakiendelea kijana huyo alikimbilia dukani kwa Bi Irene Mpoki na kumjeruhi kwa panga mkono wake wa kulia wakati akimzuia kuingia dukani kujificha hali iliyozidisha jazba za wananchi hao na kupelekea kijana huyo kutoka nje ya duka hilo na kwenda kumjeruhi mwananchi mwingine kwa panga mgongoni.
Katika kile kilichoonyesha kuwa kijana huyo alikuwa amechanganyikiwa vibaya ni pale alipokimbia na kwenda kujificha katika baiskeli ya mtu mwenye ulemavu akiamini kuwa ni kificho kizuri ama kichaka hali iliyopelekea wananchi kumzingira na kutaka kumchoma moto kabla ya kijana huyo kumnyanyua juu mlemavu huyo na kumgeuza ngao yake kwa wananchi hao ambao tayari walikuwa wamemzingira na tayari kwa kumchoma moto.
Kifo cha kijana huyo kiliepushwa na askari polisi waliofika katika eneo hilo na kumchukua na kumpeleka kituo cha polisi huku tayari wananchi wakiwa wamemjeruhi kwa mapanga kichwani na mgongoni pamoja na kumpiga mawe kiasi cha kutosha hali ambayo ilionyesha wazi kijana huyo kuwa hoi kwa kipigo hicho.
Kamanda wa polisi wa mkoa wa Mbeya Advocate Nyombi alithibitisha kutokea kwa tukio hilo la kudai kuwa ushirikiano mzuri wa wananachi na jeshi la polisi ndio uliookoa maisha ya wananchi zaidi kujeruhiwa kwa panga na kijana huyo na kuwa vinginevyo kijana huyo angeweza kusababisha maafa makubwa zaidi.
